عن العشق والهوى

دايما لما بروح اى مكان باخد كشكول عزيز عليا بكتب فى اى حاجه واى شخبطه واى رسمه ومش بحب اقطع منه حاجه المهم وانا بقلب فى الكشكول ده لقيت حاجه كنت كتباها

كنت لسه خارجه من فيلم عن العشق والهوى ومتاثره اوى منه

تعالو شوفو انا كتبت ايه

من الصعوبه ان تكتمل قصه حب حتى النهايه السعيده اللى بنشوفها فى الافلام

فدايما بنستى من غير ما نشعر نهايه للحب اللى مش دايما بيدوم وكأننا عارفين انه هينتهى

بتدور احداث الفيلم حول البحث عن الحب مهما كانت الظروف ومهما كانت العواقب اللى هتيجى بعد اختيار هذا الحب

شخصيات الفيلم

منى زكى(عليا) : بنت مجرد بنت بسيطه جميله ساكنه فى حى شعبى بتعيش مع اختها (فاطمه بطاطس) اللى بتشتغل فى محل بار كانت بتعتقد انها بتشتغل عشان اختها وتوفر ليها كل طلباتها وكأن كل متطلبات

.عليا هى الماده فقط نست ان اختها محتاجه اشياء اخرى اكثر من الماده

ورغم كل المصاعب اللى مرت بيها عليا لكن كان فيه حاجه دايما كانت مصبراها مش مصبراها وبس كانت ممكن تكون منسياها كل همومها . الحاجه دى هى حبها لعمر اللى كان واعدها بالزواج بس لما يكلم العيله والوحيد اللى يقدر يقول للعيله هو اخوه على وفعلا اتفق عمر مع عليا ان اخوه هيجى الحفله اللى هتغنى عليا فيها وهيشوفها وهيتعرف عليها عشان يبلغ العيله وبالفعل شافها وشاف اختها فاطمه بطاطس وشاء القدر ان يلعب لعبته

يروح على البار اللى بتشتغل فيه فاطمه ويعرفها على حقيقتها وفى اللحظه دى بيبلغ عمر ان العيله دى متنفعش تكون عيله لمراتك

عمر راح لفاطمه وقالها انه عمره ما هينسى عاليا وانه هيفضل يحبها طول عمره.بس كان ممكن عمر يتمسك بحبه بس نرجع ونقول ده القدر اللى مكتوب عليهم

المهم نرجع لعليا اللى الحلم الوحيد اللى كان فى حياتها اختفها وراح والسبب كان اختها. ده لو عمر سابها وظلمها هيبقى احساس اهون من انه سابها عشان اختها

نيجى لمشهد يعتبر من المشاهد الصعبه من وجهه نظرى فى الفيلم اللى فيه عمر بيمسح كل صور عليا من الكومبيوتر وفى نفس الوقت مش قادر يمسحها لانه بيحبها جدا ومن كتر حزنه على عليا انفجر فى البكاء

فعلا الفراق ده صعب قوى وخصوصا لو مكنتش هتقدر تعوض الانسان ده تانى

بس الزمن بينسى. عمر اتجوز وكمان ولد جميل بس عليا عمرها ما هتنساه

دايما على بالها الدنيا لفت بيها وراحت ولسه بتحبه

وعمر بعد ما ظلم مراته واتجوز عليها واحده تانيه

افتكر انه مديون لعليا بقعده اعتذار للاسف عليا افتكرت انه جاى يرجع ويصحى اللى فات

وفضلت فرحانه جدا ومستنياه يتكلم ويقول انه عايز يرجع و فـ وسط كلامها عمر غلط وقالها سلمى وغلط فى اسمها

طبعا حست ان الفرحه ماتت واحلامها اللى رسمتها فى اللحظه اتكسرت وقالتله انا عايزه اروح

روحت عليا وعرفت انها لازم تفوق وتبتدى من جديد